Cebuano News: 150 ka MSME nga nabalda sa COVID-19 'nag-DTI CARES'

Cebuano News: 150 ka MSME nga nabalda sa COVID-19 'nag-DTI CARES'

TAGBILARAN CITY, Bohol, June 19 (PIA) — Gibanabana sa Department of Trade and Industry (DTI) sa Bohol nga naa sa 100 nagdto sa 150 na ka gagmay nga mamumuhunan nga nakapadagan na sa ilang ginagmay nga negosyo sa labing menos usa ka tuig ang nakaduso na sa ilang application sa pahuwam nga nasukip sa DTI Covid-19 Assistance to Restart Enterprises (DTI CARES).

Kini maoy gibutyag ni Veronee Tocmo, Provincial Coordinator sa DTI Small Business Corporation (DTI SBCorp) sa usa ka oras nga pagpakighinabi sa Kapihan sa PIA.

Ang DTI CARES, pinaagi sa attached agency niini nga SBCorp nagpahat og usa ka bilyon nga loan portfolio alang sa mga ginagmay nga mga negosyante sa micro, small ug medium enterprises category nga apektado ang ilang negosyo sa corona virus disease (COVID).

GAWAS SA HUWAM PAMUHUNAN. Ang DTI mag-agak gayud sa mga negosyo nga ilang gitabangan, serbisyo nga gitanyag niini sa ilang mga business counselors sa Negosyo Center, sa DTO mismo pinaagi sa Shared Service Facilities ug sa Kapatid Mentor ME Program, matud ni Tocmo. (PIA Bohol)

Matud ni Tocmo, niadto pang Abril nila nga gipahibawo ang mga gagmay nga negosyante nga nagkinahanglan og dugang pundo aron ikapadagan og balik sa ilang negosyo.

Sa susama nga buwan usab nila nga gisugdan pagpanawat sa applications alang sa pahuwam nga walay interest nga mahimong bayaran sulod sa duha ka tuig.

Gani, dugang sa DTI SBCorp, may tanyag pa usab ang kagamhanan nga unom ka buwan nga grace period kanus-a mahimo nga dili pa magsugod og bayad ang kliyente hangtod nga makabarug na gayud.

Sa iyang taho sa Kapihan sa PIA, gibutyag ni Tocmo nga sa mga Bol-anon nga nanghuwam, may mga loan applications nga naaprobahan na samtang nagkasayun ang application sa huwam kay kini gibuksan na sa online pinaagi sa SBCorp nga facebook accounts.

Sa mga naaprobahan na sa Bohol, ang labing daku nga loan amount mikabat sa P200 mil samtang ang labing ubos P20 mil.

Gipasabut usab ni Tocmo sa DTI SBCorp nga ang mga tag-iya mismo sa mga negosyo ang mag-igo kon pila ang ilang huwaman, subay usab sa kapasidad nila sa pagbayad kon itandi sa ilang negosyo.

Ang mga makahuwam kadtong may capitalization nga gikan sa labing gamay ngadto na sa P15 million, basta lamang rehistrado sa DTI ug may gihuptan nga Mayors Permit.

Hinuon, dugang niya, kinahanglan ang negosyo naa gayuy address, dili mahimo kadtong mga suroysuroy sama sa food carts o ambulant vendors dala sa kalisud sa pagpaningil niini.

Alang sa mga manghuwam, kaniadto nga personal nga iduso ang application nagdto sa DTI pinaagi sa mga Negosyo Centers sa kalungsuran, karon mahimo na sa online ug kini bukas taman Hunto 19 sa may alas dose sa tunga nga gabii lamang.

Ang manghuwam kinahanglan lamang nga mopresentar sa ilang DTI registration, Mayors permit, hulagway sa ilang negosyo ug government issued ID sa nanghuwam. Kini maoy iattach sa application documents ug iduso online.

Hinuon, sa mga dili na makaapas ug matak-opan na sa DTI CARES credit facility gibutyag sa DTI nga maghuwat lamang kon may ikaduhang hugna niini o kun kanus-a ikabalik ang Pundo Para sa Pagbabago ug Pag-asenso, laing credit facility nga tanyag sa DTI nga temporaryong gisuspendir human gipagawas ang DTI CARES. (rahc/PIA-7/Bohol)